Llwybr newydd ar gyfer gyrfa ym myd technoleg - mae gradd ddigidol wedi’i hailwampio yn cael ei datgelu yn ystod Wythnos Prentisiaethau Cymru

Mae’r Brifysgol Agored wedi cyhoeddi Prentisiaeth Gradd Ddigidol i Gymru. 

Mae’r rhaglen yn galluogi prentisiaethau i astudio ar gyfer BSc (Anrhydedd), gan ddatblygu arbenigedd mewn gwyddor data, rheoli diogelwch seiber neu beirianneg meddalwedd - a’r cyfan tra maent yn ennill cyflog gyda’u cyflogwr. 

Mae’r rhaglen newydd yn cymryd lle Prentisiaeth Gradd flaengar y Brifysgol Agored yng Nghymru mewn Peirianneg Meddalwedd Gymhwysol.

I gyflogwyr, gall y Brentisiaeth Gradd Ddigidol helpu i uwchsgilio staff presennol, neu ddwyn talent newydd i fynd i’r afael â bylchau penodol o safbwynt sgiliau. Mae llefydd ar y rhaglen wedi’u hariannu’n llawn gan Lywodraeth Cymru drwy Medr. 

'Mae Wythnos Prentisiaethau Cymru yn amser gwych i atgoffa pobl o’r cyfle anhygoel y gall prentisiaeth ei roi,' dywedodd Rebecca Falvey, Uwch Reolwr Sgiliau ac Arloesi yn y Brifysgol Agored yng Nghymru. 'Gallwch astudio am radd tra’n cael budd o brofiad yn y diwydiant a chyflog. Mae’r hyblygrwydd yma yn ganolog i’n Prentisiaeth Gradd Ddigidol, sydd wedi’i chynllunio er mwyn adlewyrchu diwydiant sy’n newid yn gyson, a rhoi’r sgiliau sydd eu hangen i brentisiaid er mwyn uwchsgilio wrth i dechnoleg newid.'