Staff a myfyrwyr y Brifysgol Agored yn rhannu awgrymiadau ardderchog ynglŷn ag arian

Pound symbol

Tasg braidd yn anodd yw siarad am arian. Dyna pam y mae’r Gwasanaeth Arian a Phensiynau yn annog pawb i drafod eu cyllid personol yn fwy agored yn ystod wythnos gyntaf mis Tachwedd. Mae’r Wythnos Siarad Arian yn gyfle gwych i danio sgyrsiau am arian gyda’ch cydfyfyrwyr, eich cydweithwyr, eich teulu a’ch cyfeillion.

Trwy drafod arian yn ein bywydau beunyddiol, gallwn fagu’r hyder a’r gwytnwch angenrheidiol i wynebu beth bynnag a ddaw i’n rhan yn y dyfodol.

Thema’r wythnos Wythnos Siarad Arian eleni yw ‘gwnewch un peth’. Tybed beth allai wella eich llesiant ariannol chi? Mae gan staff a myfyrwyr y Brifysgol Agored yng Nghymru syniadau gwych i’ch rhoi ar ben ffordd:

Cofrestrwch i gael cylchlythyr Money Saving Expert. Mae’n anhygoel. Hefyd, rydw i’n argymell Academi Arian MSE, sef cwrs rhad ac am ddim gan y Brifysgol Agored a Money Saving Expert.

Cadwch olwg am elusennau ac ymddiriedolaethau a all gynnig arian grant i bobl sy’n wynebu caledi. Gweler Family Action a Turn2us.”

Cadwch olwg am apiau bwyd rhad neu am ddim fel Olio a Too good to go.

Mae gan Money Helper gyfrifianellau gwych ac adnoddau eraill a all eich helpu i fynd i’r afael â sefyllfaoedd neu broblemau cyffredin yn ymwneud ag arian.

Martin Lewis yn sôn am cwrs OpenLearn Academi Arian MSE

 

Mae’n syniad da prynu llwyth mawr o fwyd anifeiliaid – bydd hyn yn arbed arian yn y pen draw. Os ydych yn cael trafferthion mawr, mae’r fath beth â banciau bwyd anifeiliaid yn bodoli.

Rydw i’n nodi fy alldaliadau a’m biliau hanfodol ar ddu a gwyn ac yn trefnu i’r taliadau hyn adael fy nghyfrif ar ôl imi gael tâl, felly rydw i’n gwybod faint o arian sydd gennyf ar ôl ar gyfer gweddill y mis.

Prynwch fwydydd mewn amlbecynnau – yna, gallwch eu hollti, eu rhewi a’u dadmer pan fo angen (neu gallwch ferwi llysiau heb eu dadmer). Y cynhwysion gorau yw cynhwysion y gallwch eu defnyddio mewn llawer o wahanol ryseitiau, fel nionod, pupurau, madarch, cyw iâr, ysbigoglys a chennin! Bydd hyn yn helpu i arbed arian a lleihau gwastraff. Gweler yr arweiniad hwn ar rewi bwyd gan BBC Good Food.

Os ydych yn cael anhawster i gynilo neu os nad ydych yn gwybod ble i ddechrau, efallai y gallai apiau ‘cynilo awtomatig’ eich helpu. Darllenwch yr erthygl hon gan Money Saving Expert i weld sut y maent yn gweithio a pha rai i’w dewis.

 

Podlediad Sgwrsio am Brifysgol, Pennod 4: A alla’ i fforddio mynd i’r brifysgol?

 

Mae plant yn tyfu trwy’u dillad yn gyflym, felly prynwch ddillad ail law. Mae yna lawer o wefannau ac apiau fel Vinted lle gallwch brynu bwndeli o ddillad plant. Mae’n arbed llawer iawn o arian. Hefyd, holwch a oes gan ysgol eich plentyn neu’r Gymdeithas Rhieni ac Athrawon siop cyfnewid dillad ysgol.

Gwaith hawdd iawn yw gwneud toes pizza – gall un bag mawr o flawd cryf wneud wyth pizza!

Mae cael gwahanol ‘gyfrifon’ neu ‘botiau’ ar gyfer gwahanol bethau yn ddefnyddiol. Gall hyn eich helpu i gadw trefn ar yr arian a wariwch ar bethau fel bwyd a phetrol.

Cynlluniwch eich prydau ar gyfer yr wythnos. Gwnewch restr siopa cyn mynd i’r siop a cheisiwch gadw at y pethau sydd ar y rhestr.

 

A ydych yn un o fyfyrwyr y Brifysgol Agored neu’n ystyried astudio gyda ni?

Mae gan Einir England, Uwch-reolwr ar gyfer Ffioedd a Chyllid yng Nghymru, chwe awgrym a all eich helpu gyda’ch llesiant ariannol.

1. Gwnewch yn siŵr eich bod yn gwneud cais am yr holl gyllid y mae gennych hawl i’w gael.
Os ydych yn fyfyriwr sy’n byw yng Nghymru, cyn ichi ddechrau modiwl cyntaf eich cymhwyster, fe allech fod yn gymwys i gael arian gan Cyllid Myfyrwyr Cymru tuag at ffioedd a chostau byw. Hefyd, mae cymorth ychwanegol ar gael i fyfyrwyr â dibynyddion.
2. Os oes gennych anabledd, gwnewch gais am Lwfans i Fyfyrwyr Anabl.
Dyma gymorth ychwanegol gan Cyllid Myfyrwyr Cymru, ar ben yr arian arall a gewch, a gallwch ei ddefnyddio i dalu costau sy’n gysylltiedig ag astudio, fel cyfarpar, cymorth anfeddygol, llungopïo ac argraffu.
3. Gwnewch yn fawr o ostyngiadau i fyfyrwyr.
Cofiwch holi a oes modd ichi gael gostyngiad gan eich bod yn fyfyriwr. Gallwch gael ychwaneg o ostyngiadau trwy gael cerdyn TOTUM neu trwy ymuno ag UNIdays a Student Beans.
4. Gwnewch yn fawr o adnoddau am ddim sydd ar gael yn y Brifysgol Agored.
Er enghraifft, gallwch gofrestru ar gwrs Academi Arian MSE ar OpenLearn, fel y nodir uchod, neu beth am ddarganfod cyrsiau rhad ac am ddim eraill fel Managing my money for young adults.
5. Siaradwch â rhywun.
Gall pryderon ariannol gael effaith fawr ar ein hiechyd meddwl a’n llesiant cyffredinol. Os ydych yn teimlo’n isel, efallai y bydd hi’n anos ichi reoli eich materion ariannol. Mae Mind yn cynnig awgrymiadau ymarferol yn ymwneud â rheoli eich arian a gwella eich iechyd meddwl. 
6. Cofiwch gysylltu os yw eich pryderon ariannol yn effeithio ar eich astudiaethau.
Os oes gennych bryderon ariannol, cysylltwch â’n Tîm Recriwtio a Chefnogi Myfyrwyr i drafod eich opsiynau astudio.

Request your prospectus

Darllenwch am ein cymwysterau a’n cyrsiau drwy ofyn am brosbectws heddiw

Gofyn am brosbectws

Open University in Wales media enquiries:

Rhodri Davies 
Uwch Reolwr Cyfathrebu
Ffôn: 029 21 674 532

Am ymholiadau cyfryngau cyffredinol Y Brifysgol Agored, cysylltwch â
swyddfa'r wasg
Ffôn: 01908 654316 /
Y tu allan i oriau swyddfa: 07901 515891

Coffi a biscedi ar fwrdd

Cydweithrediad y Brifysgol Agored gyda'r Talking Shop

Ar 28 Chwefror bydd y Brifysgol Agored (OU) yng Nghymru yn cyd-gynnal yn y Siop Siarad yn y Coed Duon, ac eisiau clywed gan bobl ifanc (16-25).

Mae’r Brifysgol Agored yn gweithio gydag Undeb Rygbi Cymru i hyrwyddo rygbi ledled Cymru

Mae’r Brifysgol Agored yng Nghymru yn gweithio gydag Undeb Rygbi Cymru (WRU) i asesu effaith ehangach un o’i rhaglenni yn ysgolion Cymru.

See all