Mae Tony, sy’n wyth deg saith oed, ymysg cannoedd o raddedigion yn y seremoni raddio

Cyrhaeddodd dros 600 o fyfyrwyr y Ganolfan Gynadledda Ryngwladol (ICC) yng Nghasnewydd, fel rhan o seremoni raddio'r Brifysgol Agored yng Nghymru.

Yn ystod seremonïau'r bore a’r prynhawn, cerddodd myfyrwyr ar draws lwyfan yr ICC i dderbyn eu graddau gan Ddirprwy Is-Ganghellor Ymchwil, Menter ac Ysgoloriaethau’r Brifysgol Agored, Yr Athro Kevin Shakesheff a Chyfarwyddwr Y Brifysgol Agored yng Nghymru, Ben Lewis.

Ymysg y graddedigion, roedd Tony Morton o Gaerdydd, sy’n 87 oed. Dechreuodd y cyfarwyddwr cwmni, sydd wedi ymddeol, astudio ar gyfer gradd yn ystod y pandemig covid a’r cyfnod clo cenedlaethol.

'Ni fuaswn wedi gallu cwblhau fy astudiaethau heb y cymorth technegol rwyf wedi ei dderbyn a’r gefnogaeth gan fy narlithwyr cyswllt yn y Brifysgol Agored dywedodd Tony. 'Wrth i’r cyfnod clo ddod i rym yn y DU yn sgil Covid, roeddwn ar goll. Roeddwn yn 84 oed ac yn actif iawn, ac nid oeddwn yn edrych ymlaen at gael fy nghloi mewn a bod yn unig. Gyda pherswâd fy nheulu i gyflawni un o’m huchelgeisiau mewn bywyd, dechreuais astudio gradd gyda’r Brifysgol Agored a dechreuais ar fy nhaith rithwir o ddarganfod.'

Ar ôl gorffen ei radd yn gynharach eleni, cafodd Tony gydnabyddiaeth yn y gwobrau Inspire! dysgu Oedolion, gan ennill gwobr yn y Categori Heneiddio’n Dda.

Cafodd Tony a’i gyd-fyfyrwyr gwmni graddedigion er anrhydedd y Brifysgol Agored, Dr Jane Davidson a Jason Mohammad.

Mae Jane Davidson yn gyn-gynghorydd Cyngor Caerdydd, yn Aelod Cynulliad ar gyfer Pontypridd ac yn Weinidog yn Llywodraeth Cymru.

Fel Gweinidog dros yr Amgylchedd, Cynaliadwyedd a Thai, cyflwynodd ardoll gyntaf y DU ar fagiau defnydd untro; a Deddf Llesiant Cenedlaethau’r Dyfodol (Cymru) 2015, sydd wedi gwneud datblygiad cynaliadwy yn egwyddor trefn ganolog sector cyhoeddus Cymru.

Dywedodd Jane Davidson:

'Rwy'n angerddol am wneud yn siŵr bod gennym ddyfodol byw i bob un ohonom ar y blaned hon. Rwy'n falch iawn o fod yma i dderbyn gradd er anrhydedd y Brifysgol Agored. Mae'n anrhydedd arbennig. Mae'r Brifysgol Agored mewn sefyllfa berffaith i helpu ei holl fyfyrwyr i ddeall effaith peidio â gweithredu ar eu bywydau a bywydau cenedlaethau'r dyfodol'.

Dechreuodd Jason Mohammad, o Drelái, ar ei yrfa gyda BBC Wales Today. Ar hyn o bryd, mae’n cyflwyno sioe fore Radio Wales, ac mae’n cael ei adnabod ledled y DU fel darlledwr chwaraeon ym meysydd rygbi, pêl-droed ac athletau.

Fel Mwslim, mae Jason wedi siarad yn agored am ei ffydd. Yn 2009, creodd raglen ddogfen Y Daith ar gyfer S4C ar ei bererindod i Mecca, y gwnaeth ei disgrifio fel ‘deffroad ysbrydol’.  

Mae hefyd wedi rhoi ei gefnogaeth i sefydliadau sy’n cefnogi pobl ifanc Du, Asiaidd a phobl o leiafrifoedd ethnig i mewn i chwaraeon. Yn ogystal, mae wedi sefydlu ei Jason Mohammad Academy ei hun, mewn partneriaeth â Choleg Caerdydd a’r Fro, sy’n awyddus i gefnogi pobl ifanc yn y brifddinas a ger y brifddinas sydd â diddordeb mewn gyrfa ym maes darlledu.

Dywedodd Jason Mohammad:

'Rwyf wrth fy modd yn cael derbyn y fraint fendigedig hon gan y Brifysgol Agored yng Nghymru. Mae gennyf ffrind da iawn a gyflawnodd radd gyda'r Brifysgol Agored sydd erbyn hyn yn byw breuddwyd yn California. Nid wyf erioed wedi rhoi’r gorau i hyrwyddo dysgu gydol oes, ac mae’n rhywbeth rwyf wedi ymrwymo’n llawn iddo, wrth i fy Academi gyfryngau fynd o nerth i nerth.'

'Mae angen i bawb ohonom wneud mwy i annog pobl naill ai i barhau neu gychwyn gwneud yn fawr o’u cyfleoedd drwy ddarllen, ysgrifennu a holi cwestiynau am ein byd. Llongyfarchiadau i’r holl raddedigion. Dymuniadau gorau posib ichi gyda beth bynnag y gwnewch nesaf. Rwy'n eich edmygu. Rwy’n falch iawn drosoch, ewch allan i’r byd a dangoswch yr hyn sydd gennych i’w gynnig.'