Gwaith ymchwil newydd yn edrych ar ddealltwriaeth wleidyddol pobl ifanc yng Nghymru

Mae adroddiad a gyhoeddwyd gan y Brifysgol Agored heddiw yn dangos bod pobl ifanc yng Nghymru yn fwy tebygol o fod yn anfodlon gyda democratiaeth ac yn llai tebygol o gymryd rhan mewn gwleidyddiaeth ffurfiol. 

Mae’r gwaith ymchwil yn dilyn prosiect Ysgogwyr Newid y Brifysgol Agored, a fu’n gweithio gyda phobl 16-24 mlwydd oed yng Nghymru i ddarganfod beth maen nhw’n ei wybod am sefydliadau gwleidyddol yn y DU a sut i sbarduno newid cymdeithasol.

Ymgyrchu gwleidyddol a seneddau ledled y DU

Mae canfyddiadau ymchwil eraill yn dangos bod pobl ifanc o Gymru’n teimlo’n fwy hyderus yn eu gallu i ddylanwadu ar newid drwy senedd Cymru o’i gymharu â senedd y DU, ond bod llawer yn ansicr ynglŷn â sut i gyflwyno’r newid hwnnw.

Dywedodd nifer o’r bobl ifanc a holwyd hefyd eu bod yn dibynnu’n bennaf ar y cyfryngau cymdeithasol am wybodaeth am faterion gwleidyddol a chymdeithasol. Mae llawer hefyd yn teimlo eu bod yn gallu gwneud newid cymdeithasol y tu allan i seneddau – er enghraifft trwy ymgyrchu lleol, codi ymwybyddiaeth o fater penodol, neu greu deiseb.

Mae argymhellion yr adroddiad yn cynnwys cynyddu’r ffocws ar addysg wleidyddol mewn cwricwla ysgolion y DU, a darparu addysg am ddinasyddiaeth i oedolion.

Gwefan newydd i helpu pobl ifanc wneud newid

Mae’r tîm y tu ôl i’r gwaith ymchwil hefyd wedi creu Ysgogwyr Newid, gwefan i bobl ifanc sy’n rhoi cyngor ymarferol ynglŷn â sut i weithredu ar faterion sy’n bwysig iddyn nhw. Mae’n cynnwys gwybodaeth am senedd y DU, y Senedd a chynghorau lleol, gan egluro pa un o’r rhain sy’n gyfrifol am wahanol feysydd polisi.

'Mae cyflymder y newid mewn gwleidyddiaeth, technoleg a’r cyfryngau yn gynt nag erioed,' dywedodd Donna Smith, Uwch Ddarlithydd mewn Gwleidyddiaeth yn y Brifysgol Agored, a phrif awdur yr adroddiad. 'Er bod hyn yn gyffrous, mae’n gallu bod yn anodd dal i fyny, a gall llawer o bobl deimlo’n analluog os byddant yn credu bod penderfyniadau’n cael eu gwneud hebddynt. Mae ein gwaith ymchwil wedi dangos bod pobl ifanc yn fwy tebygol o deimlo fel hyn am wleidyddiaeth, ac yn llai tebygol o bleidleisio neu ymuno â phlaid wleidyddol.

'Nod y prosiect Ysgogwyr Newid oedd darganfod yr hyn y mae pobl ifanc yn ei wybod am wleidyddiaeth, a’r hyn maent yn ei ddeall am eu gallu eu hunain i wneud newid. Mae’n bwysig bod pob un ohonom sydd â diddordeb yn ein proses ddemocrataidd yn cefnogi pobl ifanc i ddysgu am ddinasyddiaeth mewn ffordd sy’n addas iddyn nhw, fel eu bod yn teimlo bod ganddynt fwy o rym i newid yr hyn sy’n bwysig iddynt.'