Ben Lewis yn cael ei henwi fel Cymrawd Cymdeithas Ddysgedig Cymru

Mae Cymdeithas Ddysgedig Cymru wedi enwi Ben Lewis, ein Pennaeth a Chyfarwyddwr Cenedlaethol yma yn y Brifysgol Agored yng Nghymru, ymhlith ei Chymrodyr newydd.

Mae cyhoeddi 44 o Gymrodyr newydd, gyda Ben Lewis yn eu plith, yn gyfle i ddathlu amrywiaeth ymchwil, arloesedd, arweinyddiaeth a chreadigrwydd Cymru.

Mae dros hanner (52%) o Gymrodyr newydd y gymdeithas yn fenywod. Maent yn gweithio'n weithredol tuag at greu Cymrodoriaeth sy'n adlewyrchu amrywiaeth Cymru, ac rydym yn hapus dros ben i gyrraedd y garreg filltir o ethol y gyfran uchaf o fenywod yn ein hanes.

“Mae croesawu ein Cymrodyr newydd i'r Gymdeithas bob amser yn un o brif uchafbwyntiau blwyddyn y Gymdeithas,” meddai Hywel Thomas, Llywydd Cymdeithas Ddysgedig Cymru.

“Hoffwn eu llongyfarch nhw ar y gydnabyddiaeth hon o ragoriaeth a phwysigrwydd eu gwaith a'u cyfraniadau i fywyd yng Nghymru a thu hwnt. Rydym yn edrych ymlaen at ddefnyddio eu profiad a'u gwybodaeth yn ein gwaith ar bolisi a datblygiad ymchwilwyr.

“Rwyf yn gyffrous dros ben hefyd bod ein gwaith ar gydraddoldeb, amrywiaeth a chynhwysiant yn dechrau gweld y Gymrodoriaeth yn cynnwys nifer mwy o fenywod. Mewn tair allan o'r pum mlynedd diwethaf, mae menywod wedi ffurfio bron neu ychydig dros 50% o'r Cymrodyr newydd.

“Mae hyn wedi bod yn ganlyniad ein hymdrechion i gynnwys ein hymrwymiad mewn perthynas â Chydraddoldeb, Amrywiaeth a Chynhwysiant ar bob cam, i wneud y broses enwebu'n fwy hygyrch, ac i gynnal cyfres o ddigwyddiadau sydd yn benodol yn targedu menywod academaidd ac arweinwyr dinesig a allai fod â diddordeb mewn ymuno â'r Gymdeithas.”

Rwyf yn gyffrous dros ben hefyd bod ein gwaith ar gydraddoldeb, amrywiaeth a chynhwysiant yn dechrau gweld y Gymrodoriaeth yn cynnwys nifer mwy o fenywod. Mewn tair allan o'r pum mlynedd diwethaf, mae menywod wedi ffurfio bron neu ychydig dros 50% o'r Cymrodyr newydd.

Hywel Thomas Llywydd Cymdeithas Ddysgedig Cymru

Fel bob amser, mae Cymrodyr newydd y gymdeithas yn dod o bob maes o'r celfyddydau, y dyniaethau a'r gwyddorau ac eleni, maen nhw'n adlewyrchu pwysigrwydd bywyd diwylliannol bywiog i gymdeithas Cymru. Mae'r cerddorion yr Athro Helena Gaunt, Dr Iwan Llewelyn-Jones a'r Athro Iain Quinn yn cyfuno perfformio gyda rolau arweinyddiaeth a dysg, mae Chris Catling yn brif weithredwr Comisiwn Brenhinol Henebion Cymru, ac mae cerfluniau ffiguraidd Claire Curneen yn cael eu casglu a'u harddangos ar draws y byd.

Mae enw da Cymru am wneud gwaith pwysig ar yr hinsawdd ac iechyd yn cael ei adlewyrchu hefyd yng Nghymrodyr newydd y gymdeithas. Mae yr Athro Simon Creer yn defnyddio technegau moleciwlaidd i asesu bioamrywiaeth ar draws biomau, tra bod yr Athro Sarah Davies yn ymchwilio i effaith eithafion tywydd ar ardaloedd arfordirol a threftadaeth, ac mae Dr Emma McKinley, sy'n arweinydd academaidd Severn Estuary Partnership, yn defnyddio ei hymchwil i gefnogi edrych ar ôl y moroedd yn well.

Mae cryfderau nodedig hefyd yn y maes peirianneg, yn enwedig wrth ddefnyddio AI. Mae'r Athro Cinzia Giannetti wedi gwneud gwaith arloesol ar ddefnyddio AI yn y maes gweithgynhyrchu, tra bod yr Athro Yacine Rezgui wedi bod y tu ôl i'r cwmni o'r brifysgol, Optimise AI, sy'n gwella rheoli ynni a charbon mewn adeiladau annomestig.