Y Brifysgol Agored ar y brig yng Nghymru o ran boddhad myfyrwyr

Mae myfyrwyr ledled Cymru wedi rhestru'r Brifysgol Agored fel y brifysgol orau yng Nghymru o ran boddhad cyffredinol myfyrwyr.

Mae canlyniadau Arolwg Cenedlaethol Myfyrwyr (NSS) 2026 a gyhoeddwyd heddiw (8 Gorffennaf) yn rhoi sgôr boddhad cyffredinol o 88.5% i'r Brifysgol Agored yng Nghymru.

'Mae myfyrwyr y Brifysgol Agored yn dod o bob cefndir,' meddai Ceri Wilcock, Dirprwy Gyfarwyddwr Profiad Myfyrwyr yn y Brifysgol Agored yng Nghymru. 'Mae rhai wedi ymddeol, mae rhai yn cydbwyso bywyd gwaith a theuluol, ac mae eraill yn mynd at addysg uwch am y tro cyntaf. Oherwydd hyn, mae'n hanfodol ein bod yn buddsoddi mewn amrywiaeth eang o gefnogaeth i bob un ohonynt.

'Mae ein tîm cymorth myfyrwyr arbenigol, sydd wedi'i leoli yn ein swyddfa yng Nghymru, wedi'u hyfforddi i roi'r wybodaeth, cyngor ac arweiniad sydd eu hangen ar ein dysgwyr. Mae hyn yn golygu ein bod yn eu helpu i ddeall cyllid myfyrwyr, dewis llwybrau astudio sy'n cyd-fynd â'u nodau, a datblygu'r sgiliau academaidd i lwyddo.

'Mae canlyniad heddiw hefyd yn adlewyrchu gwaith caled ein timau academaidd, sy'n datblygu cynnwys cyrsiau'n barhaus ochr yn ochr â byd sy'n newid yn gyflym. Maen nhw wedi llunio'r cwricwlwm i adlewyrchu'r hyn y mae cyflogwyr ei angen gan raddedigion, ac maen nhw bob amser wrth law i helpu pob myfyriwr yn ystod eu hastudiaethau'.