Cwmni meddalwedd Abertawe yn buddsoddi mewn prentisiaethau

Ers cyfnod disgiau hyblyg ac argraffwyr dot-matrix, mae cenedlaethau o bobl wedi creu gyrfa ym maes datblygu meddalwedd. Heddiw, yn oes Deallusrwydd Artiffisial, seiberddiogelwch a gweithio rhithiol, mae’r sgiliau i ysgrifennu cod a dylunio gwefannau yn fwy gwerthfawr nag erioed. Nid yw’n syndod felly bod mwy o ddysgwyr yn troi at brentisiaethau i gymryd eu camau cyntaf i fyd TG.

Cawsom sgwrs â Sandfish Software yn Abertawe. Mae’r cwmni wedi gosod staff ar Brentisiaeth Radd y Brifysgol Agored mewn Peirianneg Meddalwedd Gymhwysol.

Dewch i gwrdd â Stefan

Mae Sandfish Software yn helpu sefydliadau eraill i ddiweddar a gwella meddalwedd gritigol. Mae eu gwasanaethau yn cynnwys moderneiddio hen feddalwedd, creu cymwysiadau, datblygu systemau’n bwrpasol, a dylunio a datblygu gwefannau.

Dechreuodd Sandfish fel Cyfathrebiadau W3. Ar y dechrau, canolbwyntiodd W3 ar greu meddalwedd ar gyfer y sector addysg a chreu gwefannau, cyn symud ymlaen i ddatblygu ac ymgynghori ar brosiectau.

‘Heddiw mae cymwysiadau gwe a meddalwedd yn llawer mwy soffistigedig ac mae gofyn am ddull amlddisgyblaethol er mwyn datblygu,' dywedodd Stefan. 'Gydag anghenion newidiol ein cwsmeriaid, mae ein nod fel busnes wedi symud tuag at ddatblygu cymwysiadau llawn yn ymgorffori’r technolegau a’r technegau diweddaraf. Mae cwrs y Brifysgol Agored wedi ein galluogi i hyfforddi fel gweithle o’r radd flaenaf, sy’n gallu ymateb i’r heriau hyn.’

Pam prentisiaethau gradd?

Mae prentisiaethau gradd yn swyddi cyflogedig sy’n galluogi staff i ennill arian wrth astudio am radd. 

Gallwn feddwl am brentisiaethau fel cyrff sector cyhoeddus neu gwmnïau amlwladol. Er hyn, mae mwy o fentrau bach i ganolig yn troi atynt erbyn hyn.

‘Mae’r cwrs hwn yn rhoi cydbwysedd perffaith rhwng gwaith ac astudio,’ ychwanegodd Stefan. ‘Nid ydyw fel prifysgol draddodiadol. Nid oes angen ichi fynd allan o'r swyddfa am ddiwrnod neu fwy, a gallwch gwblhau eich aseiniadau o’r gwaith neu gartref. Mae hyn yn bwysig mewn busnesau fel ein busnes ni, lle mae terfynau amser cwsmeriaid yn ffactor bob amser.’

‘Un o brif wersi’r cwrs hwn yw deall pam ein bod yn gwneud pethau mewn ffordd benodol. Mae’n bwysig dysgu’r rheswm dros benderfyniadau technegol. Er enghraifft, pam fod un iaith raglennu’n fwy addas nag un arall? Mae’n golygu cymaint mwy na gwybod sut i wneud tasg.’

Parhad datblygiad

Yn ogystal, sylwodd y tîm Sandfish bod eu prentisiaid yn arddangos sgiliau eraill, mwy trosglwyddadwy. Roedd y rhain yn cynnwys rheoli prosiectau, cynllunio profion neu ddiffinio gofynion gyda chwsmeriaid.

‘Mae llawer o wybodaeth am ddiogelwch meddalwedd ar y cwrs hefyd,’ ychwanegodd Stefan. ‘Mae’n rhywbeth sydd wedi dod yn bwysicach i ni a’n cwsmeriaid.’ 

‘Mae’n ymwneud â sicrhau bod gennym y wybodaeth i gefnogi ein sgiliau Mae Deallusrwydd Artiffisial yn dod yn fwyfwy pwysig ym myd busnes. Ac er y gall ein helpu gyda rhaglennu, rydym angen gwybod beth y gall wneud i ni fel offer o hyd. Dyna pam mae peirianneg feddalwedd mor bwysig fel disgyblaeth.’

‘Mae’n wych gweld sut mae’r brifysgol yn annog cyfathrebu rhwng cyflogwyr a myfyrwyr ar y cwrs. Ceir sgyrsiau rheolaidd gyda thiwtoriaid personol, ac mae myfyrwyr yn teimlo eu bod yn cael cefnogaeth drwy gydol y cwrs. Mae hyn yn golygu ein bod yn gweld y cynnydd gwych mae prentisiaid yn ei wneud, a sut mae’n ffitio i’n gwaith.’