Arddangosfa Cymru: Ein Straeon Ni yn Sain Ffagan Amgueddfa Werin Cymru

Mae gan bob cymuned straeon sy’n werth eu hadrodd.

Straeon pwy sy’n siapio ein dealltwriaeth o Gymru? Beth sy’n gwneud i rywle deimlo fel cartref?

Trwy wrthrychau, atgofion a gweithiau celf newydd sydd wedi’u creu gan gymunedau ledled Cymru, mae arddangosfa Cymru: Ein Straeon Ni yn archwilio sut mae pobl yn creu ymdeimlad o berthyn ac yn trosglwyddo straeon o genhedlaeth i genhedlaeth.

Mae Cymru: Ein Straeon Ni yn dod â lleisiau pum cymuned o bob cwr o Gymru at ei gilydd i archwilio sut mae atgofion, traddodiadau a phrofiadau lleol yn helpu i adrodd stori’r genedl.

Cafodd yr arddangosfa rad ac am ddim hon ei chreu drwy broject REACH (Trigolion yn archwilio â’r Celfyddydau, Diwylliant a Threftadaeth) y Brifysgol Agored yng Nghymru ac Amgueddfa Cymru.

Daeth REACH â chymunedau at ei gilydd i archwilio eu hanes, rhannu atgofion a dod o hyd i straeon sydd wedi’u cuddio mewn llefydd bob dydd. Creodd pobl o bob cymuned weithiau celf ar gyfer yr arddangosfa, wedi’u hysbrydoli gan eu hanes, treftadaeth a phrofiadau lleol. Mae’r rhain yn cael eu harddangos ochr yn ochr â gwrthrychau o gasgliad Amgueddfa Cymru sydd wedi’u dewis am eu cysylltiadau ag atgofion, profiadau a chymunedau.

Ymysg y gweithiau celf a gafodd eu creu gan aelodau’r cymunedau mae draig fawr a gafodd ei chario yng Ngharnifal Butetown, cerfluniau helyg a chlytwaith wedi’i ysbrydoli gan afon Cleddau. Mae’r gwrthrychau o gasgliad Amgueddfa Cymru sy’n cael eu harddangos yn cynnwys telyn a gafodd ei gwneud gan Evan James o Bontypridd, llestr gwasael o Grochendy Ewenni, Mari Lwyd o Langynwyd, a char bara ceirch o Lanllyfni.

Gyda’i gilydd, mae’r gweithiau celf a’r gwrthrychau yn adrodd straeon am bobl, llefydd a pherthyn o bob cwr o Gymru.

Mae Cymru: Ein Straeon Ni yn dathlu sut mae pobl yn cysylltu â Chymru, â’i gilydd, a’r llefydd maen nhw’n eu galw’n gartref.

Mae REACH Cymru yn bosibl gyda chymorth Cronfa Treftadaeth y Loteri Genedlaethol. Diolch i chwaraewyr y Loteri Genedlaethol, mae cymunedau ledled Cymru wedi gallu archwilio straeon, treftadaeth a hanes drwy’r celfyddydau creadigol.

Mae REACH Cymru wedi’i gyflwyno mewn partneriaeth â’r canlynol:

• Y Brifysgol Agored yng Nghymru 
• Amgueddfa Cymru 
• Cronfa Treftadaeth y Loteri Genedlaethol

• Adra
• Cyngor Celfyddydau Cymru
• ateb
• Grŵp Codi
• Cymdeithas Tai First Choice
• Innovate Trust
• Ffederasiwn Amgueddfeydd Cymru
• Casgliad y Werin Cymru
• Iechyd Cyhoeddus Cymru
• Cymdeithas Tai Taf
• Yr Orsaf